БОРТСЕРІК БОЛУ ОҢАЙ МА?

12 шілде – бүкіләлемдік азаматтық авиация бортсерігі күні. Осы салада 7 жылдық тәжірибесі бар маман Жадыра Әліммен бортсерік болудың жолдары, мамандықтың қызығы мен қиындығы туралы сұхбаттастық.

«Менің әуедегі алғашқы еңбек жолым Air Astana компаниясынан басталды. Ол жақта 3 жыл, кейін арабтардың ұлттық авиакомпаниясы Etihad Airways-та 4 жыл жұмыс істедім.
Бортсерік боламын деген қызығушылығым студент кезімде оянды. 4-курс оқып жүргенде құрбыммен бірге Air Astana-ға жұмыс жөнінде сөйлесуге бардық. Бұл кезеңнен сәтті өтіп, жаңа салаға жол ашылды», - дейді стюрдесса.

Жадыра бортсерік болу үшін білім жағынан қандай талаптар барын айтты.
«Бұл саланы таңдаймын десеңіз, ҰБТ-да ағылшын тілі және дүниежүзі тарихын таңдау керек. Ең бастысы, ағылшын тілін білген жөн. Қазақстандық әуекомпанияларға pre-intermediate деңгейінен жоғары болу керек деген талап қойылады. Ал шетелдік компаниялар intermediate деңгейінің жоғары болғанына назар аударады.

Әр елдің әуе компаниясының талабы әртүрлі. Жалпы жұмыс бойынша сөйлесуден сәтті өтсеңіз, әрі қарай компания шамамен екі айдай уақыт тренинг өткізеді. Денсаулық бойынша міндетті түрде толық тексерістен өткізеді. Ал тренинг кезінде қауіпсіздік сақтау, алғашқы медициналық көмек көрсету секілді қызмет түрлерін үйретеді.

Бұл салада маңызды бір дүние – қызмет көрсету саласында тәжірибеңіз болғаны жақсы. Сол үшін, әсіресе, оқушылар мен студенттер, кафе не мейрамханада жұмыс істеп, тәжірибе жинай беріңіз», - дейді бортсерік.

Жадырадан әуеде жұмыс істегеннің теріс жағы бар-жоғын да сұрадық.
«Егер жақсы күтініп жүрсең, еш зияны жоқ. Авиацияда жұмыс істейтін жан үнемі check-up өту керек. Мен де жиі денсаулығымды тексертіп, қан анализін тапсырып тұрамын. Сосын рейске дейін де, рейстен кейін де дұрыс ұйықтауға тырысамын. Пайдалы ас ішемін. Спортпен айналысамын. Әсіресе, йогамен доспын. Соның арқасында денсаулығыма ешқандай зияны тимеді.

Бұл саладағы ең қиын нәрсе түнгі рейстер дер едім. Мәселен, таңғы 4-те, ұйқыңның нағыз тәтті кезінде тұрып, жұмысқа шығу керек кездер болды. Түні бойы ұшатын рейстер де болады. Сол кезде ұйқы қатты қысады. Алайда бос уақытта ұйқыны қандыру керек.

Бортсерік боламын десеңіз, мерекелерде жақындарыңызбен бола алмайтыныңызға дайын болыңыз. Өйткені атаулы күндерде шетелге іссапармен кетіп қалуыңыз әбден мүмкін.

Қазіргі таңда мен стюардесса боламын деген арман-мақсаты бар жандарға 1 айлық курсымды ұсына аламын. Бірақ бұл курсқа тек ағылшын тілін белгілі бір деңгейде білетіндерді аламын. Өзі ағылшын тілін біліп келеді, ал мен жұмыс бойынша сөйлесудің жолдарын үйретемін. Сондай-ақ тесттен қалай өту керегін де біліп шығады.», - дейді маман.